Yula.la ຂ່າວ

ຖ້າທ່ານຜ່ານສຳນັກງານໃຫຍ່ AGL ຢູ່ນະຄອນຫຼວງວຽງຈັນທ່ານຈະຮູ້ໄດ້ທັນທີວ່າບໍ່ມີໂລໂກ້ AGL ຢູ່ເທິງອາຄານອີກ ຊື່ງເປັນປ້າຍໂລໂກ້ທີ່ພວກເຮົາຄຸ້ນເຄີຍມາໂດຍຕະຫຼອດທີ່ມີຕົວອັກສອນທັງເປັນພາສາອັງກິດ ແລະ ພາສາລາວ. ດຽວນີ້ທ່ານຈະໄດ້ເຫັນໂລໂກ້ທີ່ຂຽນຄໍາວ່າ Allianz ພ້ອມເຄື່ອງໝາຍທີ່ມີລັກສະນາຂອງຫົວນົກອີນຊີ, ປະກອບໃນວົງມົນທີ່ເປັນສັນຍາລັກຂອງປະເທດເຢຍລະມັນ ແລະ ຄໍາວ່າ Allianz. 

ນອກນັ້ນຍັງມີການປ່ຽນຊື່ຈາກ Allianz General Laos (AGL) ມາເປັນ Allianz Insurance Laos Co.,Ltd. ໂດຍການນໍາໃຊ້ຊື່ ແລະ ໂລໂກ້ສາກົນມາໃຊ້ເພື່ອຮັບປະກັນພາບລັກຂອງແບຣນທີ່ແຂງແກ່ງທົ່ວໂລກ. ແລະ ເປັນທີ່ຈົດຈໍາວ່າ Allianz ແມ່ນປະກັນໄພອັນດັບ 1 ຂອງໂລກ ທີ່ຈັດອັນດັບໂດຍ Interbrand's Best Global Brand ດ້ວຍເຫດນັ້ນໂລໂກ້ກໍ່ຕ້ອງໄດ້ຮັບການເຜີຍແຜ່ສູ່ລູກຄ້າຊາວລາວເຊັ່ນກັນ.

Allianz ໄດ້ຖືກສ້າງຕັ້ງຂື້ນຕັ້ງແຕ່ປີ 1980 ໃນເມືອງ ມິວນິກ ປະເທດເຢຍລະມັນ, ໃນທົ່ວໂລກ Allianz ໄດ້ເຮັດວຽກຢ່າງໜັກ ເພື່ອຮັກສາຄວາມປອດໄພໃຫ້ແກ່ຊີວິດຂອງຄົນ ແລະ ໃຫ້ລູກຄ້າກ້າທີ່ຈະປະເຊີນກັບ ສິ່ງທີ່ຈະເປັນຜົນກະທົບຕໍ່ເປົ້າໝາຍຂອງພວກເຂົາ: "ພວກເຮົາຮັບປະກັນອະນາຄົດຂອງທ່ານ"

Allianz ໄດ້ຄຽງຄູ່ກັບປະຊາກອນຫຼາຍກວ່າ 100 ລ້ານຄົນໃນທົ່ວໂລກ ແລະ ໄດ້ເຕີບໃຫຍ່ກາຍເປັນໜຶ່ງໃນບໍລິສັດ ປະກັນໄພ, ນັກລົງທຶນ ແລະ ຜູ້ໃຫ້ບໍລິການດ້ານການຊ່ວຍເຫຼືອທີ່ໃຫຍ່ທີ່ສຸດໃນໂລກ.

ນີ້ເຮັດໃຫ້ພວກເຂົາສາມາດປົກປ້ອງລູກຄ້າຂອງພວກເຂົາໃນທ້ອງຖິ່ນ ແລະ ໃນລະດັບໂລກໂດຍການສະເໜີ ຜະລິດຕະພັນ ແລະ ການບໍລິການທີ່ຫຼາກຫຼາຍເພື່ອຕອບສະໜອງຄວາມຕ້ອງການຂອງລູກຄ້າ.