Yula.la ຂ່າວ

ໃນຕອນເຊົ້າຂອງວັນທີ 26 ກຸມພາ 2020, ໄດ້ມີພິທີເປີດການຮັບສະໝັກພະນັກງານລາວ ສຳລັບຊ່ວງດຳເນີນການ ຢູ່ທີ່ບໍລິສັດທາງລົດໄຟລາວ-ຈີນ ຈຳກັດ ນະຄອນຫຼວງວຽງຈັນ ຊຶ່ງໄດ້ຮັບກຽດເຂົ້າຮ່ວມຈາກທ່ານ ໄຊຍະບັດດິດ ຮອງຫົວໜ້າຄະນະຄຸ້ມຄອງໂຄງການກໍ່ສ້າງທາງລົດໄຟລາວ - ຈີນ, ທ່ານ ສຸບັນ ວິຈິດຕາ ຮອງຫົວໜ້າຫ້ອງການ ກຳມະທິການຮ່ວມມືລາວຈີນ, ທ່ານ ບຸນຍະລິດ​ ຂັນທະຈັກ​ ຫົວໜ້າພະແນກບໍລິຫານ​ ກົມອາຊີວະສຶກສາ ແລະ ບັນດາສື່ມວນຊົນ, ໃນນັ້ນ ທ່ານ ຫລີ ປິ່ງສວນ ອຳນວຍການໃຫຍ່ໄດ້ແນະນໍາການກະກຽມການຮັບສະໝັກພະນັກງານລາວ ສຳລັບຊ່ວງດຳເນີນການ.

ບໍລິສັດທາງລົດໄຟລາວ-ຈີນ ຈຳກັດ ຈະໄດ້ສ້າງຕຳແໜ່ງງານສຳລັບຄົນລາວ 600 - 700 ຄົນ, ການຮັບສະໝັກພະນັກງານແມ່ນຈະຈັດສັນເປັນ 3 ຊ່ວງ. ຊ່ວງທີ 1 ຄາດວ່າຈະຮັບສະໝັກ 300 ຄົນ. ຕຳແໜ່ງຫຼັກມີ 4 ປະເພດ ຄື: ທີມງານຫົວຈັກລົດໄຟ (ຄົນຂັບລົດໄຟ), ຜູ້ຄຸມການເດີນລົດ, ຜູ້ສ້ອມແປງຫົວລົດໄຟ, ພະນັກງານບຳລຸງຮັກສາພື້ນຖານໂຄງລ່າງ. ບໍລິສັດທາງລົດໄຟລາວ-ຈີນ ຈຳກັດ ຈະສະໜອງການຝຶກອົບຮົມເປັນເວລາປະມານ 13-18 ເດືອນ ສຳລັບຜູ້ທີ່ມີເງື່ອນໄຂເໝາະສົມ ຊຶ່ງຈະສົ່ງໄປຝຶກອົບຮົມທີ່ ຄຸນໝິງ ສປ ຈີນ. ຜູ້ທີ່ຜ່ານການຝຶກອົບຮົມ ແລະ ປະເມີນຜົນ ຈະໄດ້ຖືກບັນຈຸເຂົ້າເປັນພະນັກງານຂອງບໍລິສັດທາງລົດໄຟລາວ-ຈີນ ຈຳກັດ ຊຶ່ງຈະມີເງິນເດືອນ ແລະ ສະຫວັດດີການທີ່ໜ້າພໍໃຈ.

ໂຄງການລົດໄຟລາວ-ຈີນ ເປັນໂຄງການຮ່ວມມືລະຫວ່າງສອງປະເທດລາວຈີນ, ເປັນໂຄງການທີ່ມີເສັ້ນທາງລົດໄຟລະບົບລາງມາດຕະຖານແລ່ນດ້ວຍໄຟຟ້າ ໂຄງການທຳອິດໃນ ອາຊຽນ, ດ້ວຍອຸປະກອນທັນສະໄໝມາດຕະຖານສາກົນ ຊຶ່ງປະຈຸບັນແມ່ນມີຄວາມຕ້ອງການຮັບສະໝັກພະນັກງານຄົນລາວຈຳນວນຫຼາຍ ເພື່ອຮ່ວມເຮັດວຽກໃນຂົງເຂດລົດໄຟໃນຊ່ວງການດຳນເນີນການ. ເປົ້າໝາຍຂອງໂຄງການຄືການພັດທະນາພື້ນຖານໂຄງລ່າງການຂົນສົ່ງ, ພັດທະນາການເດີນທາງຂອງປະຊາຊົນ, ແລະ ຊຸກຍູ້ການພັດທະນາເສດຖະກິດສັງຄົມຂອງປະຊາຊົນລາວ. ພວກເຮົາຈະສືບຕໍ່ຜັນຂະຫຍາບນະໂຍບາຍຂອງ ສປປ ລາວ ຫັນປະເທດທີ່ບໍ່ມີທາງອອກສູ່ທະເລ ເປັນປະເທດເຊື່ອມຈອດ ແລະ ສ້າງໂຄງການລົດໄຟລາວ-ຈີນ ໃຫ້ເປັນໂຄງການຕົວແບບ ຂອງແນວຄິດໜຶ່ງແລວ ໜຶ່ງເສັ້ນທາງ. ສ້າງໂຄງການມິດຕະພາບ ສປປ ລາວ ແລະ ສປ ຈີນ ເປັນຄູ່ຮ່ວມສະຕາກຳ. ຍິນດີຕ້ອນຮັບຊາວໜຸ່ມລາວທີ່ມີຄວາມສາມາດ ມາເຂົ້າຮ່ວມບໍລິສັດທາງລົດໄຟລາວ-ຈີນ ຈຳກັດ ໃນຊ່ວງດຳເນີນການ ຮ່ວມກັນພັດທະນາເສັ້ນທາງລົດໄຟຢູ່ ສປປ ລາວ!

ການຝຶກອົບຮົມຄົນລາວ ຕຳແໜ່ງວິຊາທາງລົດໄຟເພື່ອຮັບໃຊ້ຊ່ວງການດໍາເນີນການ ລົດໄຟແບ່ງອອກເປັນ 3 ຊຸດ, ໃນຄັ້ງນີ້ປະກາດຮັບສະໝັກຊຸດທີ 1. ສະມາຊິກຄອບຄົວທີ່ໄດ້ຮັບຜົນກະທົບດ້ານການເວນຄືນ, ການຍົກຍ້າຍ, ການຍົກຍ້າຍແລວທາງ ແລະ ອື່ນໆ ຕາມເສັ້ນທາງລົດໄຟລາວ-ຈີນ ຈະໄດ້ຮັບບຸລິມະສິດໃນການເຂົ້າຝຶກອົບຮົມ.

1. ເວລາການສະໝັກ

ແຈ້ງການປະກາດຮັບສະໝັກສະບັບນີ້ມີຜົນໄລຍະຍາວ, ແຕ່ກໍານົດເວລາສົ່ງເອກະສານສຳລັບຊຸດທີ 1 ແມ່ນ ເລີ່ມແຕ່ມື້ປະກາດສະບັບນີ້ ຫາ ວັນທີ 20 ມີນາ 2020.

2. ຕໍາແໜ່ງ ແລະ ຈໍານວນ ຮັບສະໝັກ

ຊຸດທີ 1 ຮັບສະໝັກປະມານ 300 ຄົນ, ລາຍລະອຽດດັ່ງລຸ່ມນີ້:

1) ຄົນຂັບລົດໄຟ. ຮັບຜິດຊອບຂັບຫົວຈັກລົດໄຟ.

2) ຜູ້ຄຸມການເດີນລົດ. ຮັບຜິດຊອບການຄຸ້ມຄອງບັນຊາການການເດີນລົດ.

3) ຜູ້ສ້ອມແປງຫົວລົດໄຟ. ຮັບຜິດຊອບການກວດກາ ແລະ ສ້ອມແປງ ຫົວລົດໄຟ, ຫົວລົດໄຟເຄື່ອນທີ່ດ່ວນ, ຕູ້ລົດໄຟ.

4) ຊ່າງພື້ນຖານໂຄງລ່າງ. ຮັບຜິດຊອບບຳລຸງຮັກສາເສັ້ນທາງ, ຂົວ, ອຸໂມງ, ອະນັດສັນຍານ, ໂທລະຄົມ, ລະບົບສື່ສານ, ລະບົບໄຟຟ້າ ແລະ ອື່ນໆ.

3. ເງື່ອນໄຂ ແລະ ຂໍ້ກຳນົດ

1) ມີສຸຂະພາບແຂງແຮງ, ບໍ່ມີປະຫວັດກ່ຽວກັບເລື່ອງຜິດກົດໝາຍ, ມັກໃນວຽກງານຂົງເຂດລົດໄຟ.

2) ມີຄວາມຊື່ສັດ ແລະ ເຊື່ອໃຈໄດ້, ມີຜົນການຮຽນທີ່ດີ, ຮູ້ວັດທະນາທຳອົງກອນລາວ ແລະ ຈີນ.

3) ສັນຊາດລາວ, ອາຍຸບໍ່ໃຫ້ກາຍ 30 ປີ, ຫຼື ສໍາລັບຄົນທີ່ມີປະສົບການເຮັດວຽກໃນຂະແໜງການລົດໄຟແມ່ນບໍ່ໃຫ້ກາຍ 35 ປີ.

4) ຈະພິຈາລະນາພິເສດຜູ້ທີ່ ມີພື້ນຖານພາສາຈີນ, ຮຽນຈົບຊັ້ນວິທະຍະໄລ (ຊັ້ນສູງ) ຂື້ນໄປ, ຈະພິຈາລະນາພິເສດວິຊາສະເພາະດ້ານ: ການຂົນສົ່ງ, ວິສະວະກຳລົດໄຟ, ວິສະວະກຳອຸດສາຫະກຳ, ການຂົນສົ່ງທາງລາງ, ອານັດສັນຍານສື່ສານ, ກົນຈັກໄຟຟ້າ, ວິສະວະກຳກົນຈັກ, ອອກແບບ ແລະ ຜະລິດກົນຈັກ, ວິສະກະກຳໄຟຟ້າ ແລະ ເຕັກໂນໂລຊີ, ວິສະວະກຳຂໍ້ມູນ, ສັນຍານ ແລະ ການຄວບຄຸມການຂົນສົ່ງທາງລາງ, ວິສະວະກຳສື່ສານ, ການຂົນສົ່ງ, ການຄຸ້ມຄອງການຂົນສົ່ງໂລຈິສຕິກ ແລະ ອື່ນໆ.

4. ຂັ້ນຕອນການສະໝັກ

1) ໃຫ້ຕິດຕໍ່ມາຍັງທາງ Yula.la ເພື່ອຮັບເອົາແບບຟອມສະໝັກງານ, ເຊິ່ງການສະໝັກແມ່ນສາມາດສົ່ງໃບສະໝັກງານໄດ້ທັງທາງອອນລາຍ ຫຼື ຍື່ນເອກະສານດ້ວຍຕົວເອງໃຫ້ກັບທາງຕົວແທນຮັບຜິດຊອບໃນນະຄອນຫຼວງ.

2) ສອບເສັງຂຽນ ແລະ ສຳພາດ. ບົນພື້ນຖານຂອງການກວດກາເງື່ອນໄຂຂອງຜູ້ສະໝັກ, ບໍລິສັດທາງລົດໄຟລາວ-ຈີນ ຈໍາກັດ ຈະແຈ້ງຕໍ່ຜູ້ຜ່ານການຄັດເລືອກເພື່ອເຂົ້າຮ່ວມການສອບເສັງ ແລະ ສຳພາດ.

3) ຄັດເລືອກເອົາຜູ້ສະໝັກສຳລັບການຝຶກອົບຮົມ. ບໍລິສັດຈະສະເໜີຜູ້ສະໝັກເພື່ອເຂົ້າຮ່ວມການຝຶກອົບຮົມວິຊາສະເພາະ ໂດຍອີງຕາມການປະເມີນຜົນດ້ານແນວຄິດ, ຜົນການສຶກສາ, ສຸຂະພາບ, ຜົນສອບເສັງຂຽນ ແລະ ຜົນການສຳພາດ.

5. ອື່ນໆ

1) ຜູ້ສະໝັກຈະໄດ້ຮັບການສະເໜີຊື່ໃຫ້ເຂົ້າຮ່ວມການຝຶກອົບຮົມ, ບໍລິສັດຈະຄັດເລືອກຕໍາແໜ່ງ ແລະ ເນື້ອໃນການຝຶກອົບຮົມ ໂດຍອີງຕາມພື້ນຖານການປະເມີນຜົນໂດຍລວມ.

2) ບໍລິສັດຈະສົ່ງຜູ້ຖືກຄັດເລືອກໃຫ້ໄປຝຶກອົບຮົມຕົວຈິງ ຢູ່ຄຸນໝິງ, ສປ ຈີນ ເປັນເວລາ 12 ຫາ 18 ເດືອນ. ເນື້ອໃນການຝຶກອົບຮົມຫຼັກໆ ແມ່ນການຝຶກດ້ານພາສາ ແລະ ເຕັກນິກສະເພາະກ່ຽວກັບລົດໄຟ. ບໍລິສັດຈະເປັນຜູ້ຮັບຜິດຊອບຄ່າໃຊ້ຈ່າຍໃນການຝຶກອົບຮົມ. ບໍລິສັດຈະສະໜອງໂບນັສ ໃຫ້ແກ່ຜູ້ທີ່ມີຜົນການຝຶກອົບຮົມດີເດັ່ນ. ໃນໄລຍການຝຶກອົບຮົມ, ໂດຍອີງຕາມແຜນການຝຶກອົບຮົມ, ຈະໄດ້ຈັດສັນແຜນການພັກຮຽນຕາມຄວາມເໝາະສົມ.

3) ຜູ້ເຂົ້າຮ່ວມການຝຶກອົບຮົມຈະຕ້ອງເຊັນສັນຍາການຝຶກອົບຮົມກັບບໍລິສັດທາງລົດໄຟລາວ-ຈີນ ຈຳກັດ. ພາຍຫຼັງທີ່ຜ່ານການຝຶກອົບຮົມແລ້ວ, ຜູ້ເຂົ້າຮ່ວມຈະຕ້ອງຜ່ານການປະເມີນຜົນ ແລະ ຜ່ານຂັ້ນຕອນການຄັດເລືອກພະນັກງານຂອງບໍລິສັດ ຈຶ່ງຈະໄດ້ເຊັນສັນຍາແຮງງານ ແລະ ຮັບການບັນຈຸເຂົ້າເປັນພະນັກງານຂອງບໍລິສັດທາງລົດໄຟລາວ-ຈີນ ຈຳກັດ ຢ່າງເປັນທາງການ. ບໍລິສັດ ຈະສະໜອງເງິນເດືອນ ແລະ ສະຫວັດດີການທີ່ດີ.

4) ບ່ອນປະຈຳການໃນຊ່ວງດໍາເນີນການແມ່ນຢູ່ ນະຄອນຫຼວງວຽງຈັນ, ວັງວຽງ, ຫຼວງພະບາງ, ເມືອງໄຊ, ນາເຕີຍ, ບໍ່ເຕ່ນ ແລະ ບ່ອນອື່ນໆທີ່ມີລົດໄຟຜ່ານ.

ສຳລັບຂໍ້ມູນເພີ່ມຕື່ມລວມທັງການສົ່ງແບບຟອມສະໝັກວຽກແມ່ນສາມາດເຂົ້າເບິ່ງໄດ້ທີ່ລິ້ງ: https://www.yula.la/en/engineering-jobs-in-sisattanak-vientiane-capital-55042 ຫຼື ສົ່ງອີເມວມາທີ່ [email protected] ຫຼື ໂທ +856 205 555 0906

ຢ່າລໍຊ້າ! ຂາຍຫຍັງກໍໄດ້  ໃນລາວ ທີ່ Yula.la ແລະ Banlao.la ໄດ້ແລ້ວມື້ນີ້!