Yula.la ຂ່າວ

ພາຍຫຼັງງານຄັ້ງທໍາອິດ ທີ່ໄດ້ຮັບການຕອບຮັບເປັນຢ່າງດີທີ່ຫຼວງພະບາງ ໃນປີກາຍນີ້, ງານວາງສະແດງ ແນວທາງການ ພັດທະນາການທ່ອງທ່ຽວແບບຍືນຍົງ ຈະໄດ້ຈັດຂຶ້ນອີກໃນອາທິດນີ້ທີ່ ກຳແພງນະຄອນ ວຽງຈັນ ໃນວັນທີ 27-28 ກັນຍາ 2019 ທີ່ໂຮງແຮມຄຣາວ ພລາຊາ. ງານນີ້ ຖືເປັນການວາງສະແດງ ທາງ ວິຊາການລະດັບ ແຖວໜ້າຂອງພາກພື້ນ ເພື່ອເປີດໂອກາດໃຫ້ອຸດສາຫະກຳທ່ອງທ່ຽວໄດ້ສະເຫຼີມສະຫຼອງ, ຄົ້ນພົບ ແລະ ວາງ ສະແດງແນວທາງ, ຂໍ້ມູນ, ແລະ ເທັກໂນໂລຈີໃໝ່ໆ ໃນດ້ານການທ່ອງທ່ຽວ ແລະ ການບໍລິການແບບຍືນຍົງ.

54 ພາກສ່ວນຈາກລາວ ແລະ ພາກພື້ນແມ່ນ້ຳຂອງ ຈະມາວາງສະແດງຜະລິດຕະພັນ, ການບໍລິການ, ແລະ ແນວຄິດລິເລີ່ມໃໝ່ໆ ຕະຫຼອດໄລຍະເວລາ 2 ວັນຂອງງານ ທີ່ເປີດໃຫ້ຜູ້ເຂົ້າຊົມງານໄດ້ໂດຍບໍ່ເສຍຄ່າ. ບໍລິສັດທີ່ຈະວາງສະແດງເຫຼົ່ານີ້ ຈັດເຂົ້າໃນຫຼາຍຫົວຂໍ້ທີ່ຈະປະກອບຢູ່ໃນງານ: ອຸປະກອນສະໜອງໃຫ້ ໂຮງແຮມທີ່ເປັນມິດກັບສິ່ງແວດລ້ອມ, ອາຫານອິນຊີ, ແນວຄິດລິເລີ່ມ ແລະ ໂຄງການໃໝ່ໆ, ລວມເຖິງການ ສະໜອງການນຳທ່ຽວ ແລະ ບ່ອນພັກແບບມີຄວາມຮັບຜິດຊອບ.

ພາກສ່ວນທີ່ມາວາງສະແດງຈະໄດ້ນຳສະເໜີຜະລິດຕະພັນທຳຄວາມສະອາດ, ເຄື່ອງໃຊ້ໃນຫ້ອງນ້ຳ ທີ່ເປັນ ມິດກັບສິ່ງແວດລ້ອມ, ແລະ ເຄື່ອງຫຸ້ມຫໍ່ຜະລິດຕະພັນທີ່ປາສະຈາກພລາສະຕິກ. ຫຼາຍພາກສ່ວນຈະນຳ ສະເໜີຜະລິດຕະພັນທ້ອງຖິ່ນ ທີ່ຈະທົດແທນໃຫ້ອາຫານ ແລະ ເຄື່ອງດື່ມນຳເຂົ້າ. ອີກບາງພາກສ່ວນຈະເນັ້ນ ໃສ່ດ້ານເທັກໂນໂລຈີ ເຊັ່ນ ລະບົບບຳບັດນຳເສຍ, ພະລັງງານແສງອາທິດ, ແລະ ອຸປະກອນປະຢັດນ້ຳ. ທີ່ສຳຄັນ, ບໍລິສັດທີ່ເຂົ້າຮ່ວມງານວາງສະແດງ ຈະໄດ້ຮຽນຮູ້ວ່າທຸລະກິດຂອງຕົນຈະໄດ້ປະໂຫຍດຫຍັງແດ່ ຈາກການຊ່ວຍເຫຼືອ ແລະ ປະກອບສ່ວນເຂົ້າໃນການພັດທະນາຊຸມຊົນ ແລະ ແນວຄິດລິເລີ່ມທາງສັງຄົມ ຕ່າງໆ.

ເພີ່ມເຕີມໃນວາລະ ຂອງງານໃນປີນີ້ແມ່ນການສາທິດການຜະລິດ. ໃນມື້ທີສອງຂອງງານ, 11 ບໍລິສັດ ແລະ ອົງກອນ ຈະມານຳສະເໜີກ່ຽວກັບຜະລິດຕະພັນ ແລະ ການບໍລິການຂອງຕົນໃຫ້ກັບຜູ້ເຂົ້າຮ່ວມທີ່ ສົນໃຈ, ເຊິ່ງຈະລວມມີ: Asia One Resort Supply, Soap4Life Foundation, Epurtek, Pankham Jampa Holdings, Saoban Handicrafts, Green Discovery, RefillMyBottle, Mai Savanh Lao, Thavixok Rattan House, AgroAsie Group, ແລະ Bamboo Lao.

ສ່ວນໜຶ່ງທີ່ຈະເພີ່ມຄວາມສົມບູນໃຫ້ກັບງານແມ່ນ ລາຍການປະຊຸມສຳມະນາ ເຊິ່ງຈະນຳເອົາບັນດານັກຄົ້ນຄິດທີ່ມີ ຊື່ສຽງຈາກທົ່ວພາກພື້ນ ມາສົນທະນາກັນໃນຫົວຂໍ້ທີ່ສຳຄັນຕໍ່ອຸສາຫະກຳການທ່ອງທ່ຽວ. ໃນວັນສຸກທີ່ 27 ກັນຍາ, ຜູ້ເຂົ້າຮ່ວມຈະສາມາດຮັບຟັງການສຳມະນາໃນ 3 ຫົວຂໍ້: “ກົນໄກດ້ານນະໂຍບາຍຕໍ່ການຫຼຸດຜ່ອນ ພລາສຕິກໃນຂະແໜງທ່ອງທ່ຽວໃນອາຊີອາຄະເນ,” “ການພັດທະນາຊັບພະຍາກອນມະນຸດ ແລະ ການສ້າງ ວຽກເຮັດງານທຳໃນຂະແໜງການທ່ອງທ່ຽວ ແລະ ການບໍລິການ,” ແລະ “ສູ່ເສດຖະກິດວົງກົມ ດ້ານອາຫານ: ບົດບາດຂອງອຸດສາຫະກຳການທ່ອງທ່ຽວ.” ໃນວັນເສົາທີ່ 28 ກັນຍາ, ຈະມີການສຳມະນາໃນຫົວຂໍ້ “ສ້າງທຸລະກິດດ້ວຍການສື່ສານທີ່ເປັນເລີດ”, ພ້ອມດ້ວຍການປະຊຸມພາກປະຕິບັດໃນຫົວຂໍ້ “ຄວາມຍືນຍົງ ສາມາດຊ່ວຍທຸລະກິດທີ່ພັກປະຢັດເງິນໄດ້ແນວໃດ,” ເຊິ່ງຜູ້ທີ່ຈະເຂົ້າຮ່ວມຕ້ອງໄດ້ລົງທະບຽນກ່ອນ.

ງານວາງສະແດງ ແນວທາງການພັດທະນາການທ່ອງທ່ຽວແບບຍືນຍົງ ຄັ້ງທີສອງ ແມ່ນໄດ້ຈັດຂຶ້ນໂດຍ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ໂດຍໄດ້ຮັບການສະໜັບສະໜຸນຈາກກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ສະມາຄົມທຸລະກິດທ່ອງທ່ຽວລາວ, ສະມາຄົມທຸລະກິດ ໂຮງແຮມ ແລະ ຮ້ານອາຫານລາວ, ສູນບໍລິການທຸລະກິດຂະໜາດນ້ອຍ ແລະ ກາງ ພາຍໃຕ້ສະພາການຄ້າ ລາວ ແລະ ພະແນກສົ່ງເສີມທຸລະກິດຂະໜາດນ້ອຍ ແລະ ກາງ (ກະຊວງອຸສາຫະກຳ ແລະ ການຄ້າ) ແລະ ໂຄງການ ເຊື່ອມໂຍງເສດຖະກິດອາຊຽນຂອງ ສປປ ລາວ, ເພື່ອການພັດທະນາດ້ານການຄ້າ ແລະ ທຸລະກິດ (RELATED) ຂອງອົງການຮ່ວມມື ເຢຍລະມັນເພື່ອການພັດທະນາ

ສຳລັບລາຍລະອຽດລາຍຊື່ພາກສ່ວນທີ່ຈະເຂົ້າຮ່ວມວາງສະແດງ, ວາລະຕ່າງໆຂອງງານ, ຫຼື ລາຍລະອຽດຂອງ ການສຳມະນາແຕ່ລະຫົວຂໍ້, ກະລຸນາເຂົ້າເບິ່ງໃນເວັບໄຊຂອງງານໄດ້ທີ່: www.stse.la.