Yula.la ຂ່າວ

ຢາງລົດແມ່ນຊິ້ນສ່ວນທີ່ຮັບນ້ຳໜັກຫຼາຍທີ່ສຸດ ເຊິ່ງມັນຕ້ອງຮັບກັບການກົດທັບ ການແລ່ນ ລ້ຽວ ແລະເບຼກ ຜ່ານຖະໜົນທີ່ມີຄວາມຫຼາຍຫຼາຍ ຮ່ວມໄປເຖິງການຮັບມືກັບອາກາດຮ້ອນໆໃນລາວ ຖືໄດ້ວ່າຢາງລົດເປັນອຸປະກອນສຳຄັນໃນການຂັບເຄື່ອນລົດ ເປັນຫົວໃຈໃນການໃຊ້ລົດເພື່ອຄວາມປອດໄພ ແລະໄປເຖິງຈຸດໝາຍຕາມທີ່ຕ້ອງການ ບົດຄວາມນີ້ເຮົາຈະມາແນະນຳການດູແລຢາງລົດ ໃຫ້ມີອາຍຸການໃຊ້ງານດົນຂຶ້ນ ແລະເພື່ອປອດໄພໃນຍາມຂັບຂີ່

1. ກວດລົມຢາງແລະສະພາບຢ່າງສະໝ່ຳສະເໝີ

ການກວດລົມຢາງ ກໍ່ຄວນກວດສອບຢ່າງສະໝ່ຳສະເໝີ ໂດຍສະເພາະຕອນທີ່ຢາງລົດມີອຸນຫະພູມປົກກະຕິ ຖ້າຫາກຂັບຂີ່ໄປແລ້ວຈະເຮັດໃຫ້ລົມຢາງຂະຫຍາຍຕົວຈາດຄວາມຮ້ອນທີ່ເກີດຂຶ້ນເມື່ອຂັບຂີ່ ເມື່ອກວດວັດລົມຍາງໃນຂະນະທີ່ຍັງຮ້ອນຢູ່ ເຮັດໃຫ້ຄ່າກວດມີການຄາດເຄື່ອນບໍ່ຕົງກັບຄວາມເປັນຈິງ ຊະນັ້ນຄວນກວດແລະເຕີມລົມຢາງເມື່ອຢາງມີອຸນຫະພູມບໍ່ສູງຫຼາຍ ຫຼືກວດລົມຢາງກ່ອນຂັບຂີ່ 

ຫາກລົມຢາງອ່ອນກວ່າກຳນົດ ໃຫ້ຂັບຂີດ້ວຍຄວາມໄວທີ່ຕ່ຳແລະຟ້າວເອົາເຂົ້າສູນເພື່ອເຕີມລົມຢາງ ໄລຍະຂອງການປ່ຽນຢາງໃໝ່ແມ່ນ 40,000 ກິໂລແມັດ ຫຼືແລ້ວແຕ່ສະພາບແວດລ້ອມແລະປັດໃຈຕ່າງໆໃນການໃຊ້ລົດ ເມື່ອເຫັນວ່າຢາງໝົດສະພາບແມ່ນໃຫ້ປ່ຽນຢາງໃໝ່ທັນທີ

2. ກວດສອບສະພາບດອກຢາງ ແລະ ແກ້ມຢາງ

ຫາກພົບວ່າແກ້ມຢາງມີຮອຍແຕກຫຼືບວມ ບໍ່ຄວນໃຊ້ງານຢາງເສັ້ນນັ້ນ ຢາງທີ່ມີແກ້ມເປເພເສຍຫາຍສ່ຽງຕໍ່ການລະເບີດເມື່ອຂັບຂີ່ໃນຄວາມໄວສູງ ດ້ວຍລົມຢາງທີ່ຕ່ຳກວ່າມາດຕະຖານ ຫຼືມີການຮົ່ວຊຶມ ຈະເຮັດໃຫ້ລົດກິນນ້ຳມັນແລະເຮັດໃຫ້ແກ້ມຢາງເສຍຄຸນຢ່າງໄວວາ ເມື່ອແລ່ນຫຼືລ້ຽວ ຢາງທີ່ມີລົມອ່ອນຈະເຮັດໃຫ້ແກ້ມຢາງບິດບ້ຽວຕອນລ້ຽວ ເຮັດໃຫ້ອຸນຫະພູມຂອງຢາງສູງຂຶ້ນຈົນລະເບີດ

3. ບໍ່ເຕີມລົມຢາງໜ້ອຍ ຫຼື ຫຼາຍເກີນໄປ

ຫາກເຕີມລົມຢາງຫຼາຍເກີນໄປ ຫຼືເຕີມສູງກວ່າກຳນົດ  ຈະເຮັດໃຫ້ການຂັບຂີ່ແຂັງກະດ້າງ ແລະເຮັດໃຫ້ດອກຢາງເສຍຄຸນຢ່າໄວວາເຊັ່ນກັນ. ເຕີມຢາງລົດໜ້ອຍເກີນໄປ ສົ່ງຜົນເສຍຕໍ່ຢາງຢ່າງຮ້າຍແຮງ ແລະເປັນສາເຫດຫຼັກທີ່ເຮັດໃຫ້ເກີດການລະເບີດເມື່ອລົມອ່ອນແລ້ວຍັງຂັບໄວ ລົມຍາງໜ້ອຍເຮັດໃຫ້ຢາງມີອາຍຸການໃຊ້ງານໜ້ອຍລົງຕາມໄປນຳ ລົມຢາງອ່ອນເຮັດໃຫ້ດອກຢາງເສຍຄຸນໄວ ແຖມຍັງສິ້ນເປືອງນ້ຳມັນລົດຫຼາຍກວ່າລົມຢ່າງທີ່ຢູ່ໃນເກນກຳໜົດ

4. ກວດຄວາມເລິກຂອງດອກຢາງ

ຄວາມເລິກຂອງດອກຢາງເປັນສ່ວນຂອງການຍຶດເກາະ ໂດຍສະເພາະການຂັບຂີ່ໃນຍາມຝົນຕົກ ຢາງຫົວໂລ້ນນັ້ນຈະອັນຕະລາຍຫຼາຍໆ ນອກຈາກຈະບໍ່ມີອອກຢາງເພື່ອຮີດນ້ຳແລ້ວ ຢາງຫົວໂລ້ນຍັງງ່າຍຕໍ່ການລື່ນ ສ່ຽງຕໍ່ການໝຸກຕົກຖະໜົນຫຼືເບຼກລົດບໍ່ຢູ່ເມື່ອຂັບລົດຕອນຝົນຕົກ ປ່ຽນຢາງໃໝ່ທັນທີທີ່ດອກຢາງເຫຼືອໜ້ອຍກວ່າ 3 ມິລິແມັດ ຫຼືນຳໃຊ້ຈົນຄົບໄລຍະທາງ 40,000ກິໂລແມັດ ຂັບລົດດ້ວຍຄວາມລະມັດລະວັງເມື່ອຖືກຖະໜົນທີ່ມີຂຸມຫຼາຍ ເພື່ອຫຼີກລ້ຽງຄວາມເສຍຫາຍຂອງລໍ້ແລະຢາງ ຫາກຂັບຂີ່ໄວເທິງຖະໜົນທີ່ບໍ່ລຽບພຽງ ອາດຈະສ້າງຄວາມເສຍຫາຍໃຫ້ກັບໂຄງສ້າງຂອງຢາງ

ການເກັບຮັກສາຢາງລົດກໍ່ເປັນເລື່ອງສຳຄັນເຊັ່ນກັນ ເພື່ອຍືດອາຍຸການໃຊ້ງານໃຫ້ຍາວນານຂຶ້ນ ຄວນຫຼີກລ້ຽງບໍ່ໃຫ້ຢາງສຳພັດກັບຄວາມຮ້ອນ ແສງແດດ ລົມ ຝົນ ກວດສອບແລະເຕີມລົມຢາງເພື່ອໄວ້ກ່ອນອອກເດີນທາງສະເໝີ ເພື່ອຄວາມປອດໄພໃນການຂັບຂີ່