Yula.la ຂ່າວ

ລົດເປັນຍານພາຫະນະທີ່ທຸກຄົນໃຊ້ໃນປະຈຳວັນ ເປັນທີ່ຮູ້ກັນດີວ່າລົດຕ້ອງໝັ່ນກວດເບິ່ງສະພາບ ເພື່ອໃຫ້ແນ່ໃຈວ່າທ່ານຈະສາມາດຂັບຂີ່ລົດຢ່າງປອດໄພ. ບົດຄວາມນີ້ຈະແນະນຳນຳ 8 ຈຸດທີ່ທ່ານຄວນກວດສອບກ່ອນອອກຈະເດີນທາງ ເພື່ອເປັນການດູແລຮັກສາລົດ ແລະ ຄວາມປອດໄພໃນການຂັບຂີ່ຂອງທ່ານ

1. ແບັດເຕີຣີ

ລົດບໍ່ສາມາດສະຕາດໄດ້ ຖ້າບໍ່ມີແບັດເຕີຣີ ຄວນກວດເຊັກວ່າຢູ່ໃນສະພາບສົມບູນບໍ່ ມີຮອຍຂີ້ເກືອຢູ່ຂົ້ວແບັດບໍ່ ລະດັບນ້ຳກັ່ນຢູ່ໃນລະດັບປົກກະຕິບໍ່ ກວດຄວາມແໜັ້ນຂອງຂົ້ວແບັດ ແລະສາຍຕ່າງໆໃຫ້ຢູ່ໃນສະພາບສົມບູນ

2. ຢາງລົດ

ເພື່ອຄວາມປອດໄພໃນການຂັບລົດ ຄວນກວດສະສະພາບຢາງລົດກ່ອນອອກເດີນທາງທຸກຄັ້ງ ໂດຍຕາມມາດຕະຖາດ ຢາງລົດມີອາຍຸການນຳໃຊ້ 2 ປີ ຫຼື 50,000 ກິໂລແມັດ ຖ້າຄົບກຳໜົດແລ້ວແມ່ນໃຫ້ພິຈາລະນາປ່ຽນຢາງລົດ ນອກຈາກນີ້ກໍ່ໃຫ້ກວດສອບດອກຢາງລົດວ່າມັນມັນເສື່ອມລົງຫຼືບໍ່  

3. ລະບົບເບຼກ

ກວດເບິ່ງລະດັບນ້ຳມັນເບຼກ ຄວາມສະອາດຂອງນ້ຳມັນ ຖ້າມັນດຳແລ້ວຄວນລ້າງແລະຖ່າຍນ້ຳມັນໃໝ່ ພ້ອມກັນນີ້ທ່ານກໍ່ຄວນກວດເບຼກມືໂດຍການດຶງຂຶ້ນໃຫ້ສຸດ ຟັງວ່າມີສຽງເຟືອງຂຶ້ນບໍ່ ຖ້າບໍ່ມີສະແດງວ່າເບຼກຫຼັງເຮັດວຽກຜິດປົກກະຕິ ຄວນນຳເຂົ້າສູນດ່ວນ ສ່ວນເບຼກໜ້າ ໃຫ້ເບິ່ງວ່າຖ້າຢຽບແປ້ນເບຼກແລ້ວເບຼກໄດ້ປິກກະຕິ ບໍ່ມີສຽງຜິດປົກກະຕິເວລາຢຽບ ຖືວ່າຍັງຢູ່ໃນສະພາບປົກກະຕິ

4. ຊ່ວງລ່າງແລະລະບົບກັນສະເທືອນ

ກວດສອບສູນລໍ້ວ່າປົກກະຕິບໍ່ ໂດຍປົກກະຕິຖ້າສູນລໍ້ຕອນເວລາປ່ອຍພວງມາໄລລົດຈະຍັງຢູ່ຊື່ໆ ບໍ່ອຽງຂ້າມເລນໂດຍໄວ ຢ່າລືມກວດສອບໂຊ້ກນຳວ່າມີການຮົ່ວຊຶມບໍ່ ຖ້າຮົ່ວກໍ່ອາດຈະມີສຽງດັງຕອນຂັບ ເພາະລະບົກກັນສະເທືອນເຮັດວຽກຜິດປົກກະຕິ

5. ຕາໄຟ

ກວດສອບລະບົບຕາໄຟທຸກຄັ້ງກ່ອນເດີນທາງ ເພາະມັນສຳຄັນຫຼາຍສຳລັບການໃຫ້ສັນຍານຮັບຮູ້ແກ່ລົດຄັນອື່ນທີ່ສັນຈອນໄປມານຳກັນ ໂດຍໄລ່ກວດຕາໄຟນ້ອຍ, ໄຟໜ້າ, ໄຟສູງ, ໄຟລ້ຽວ, ໄຟສຸກເສີນ ແລະ ໄຟເບຼກ 

6. ລະດັບນ້ຳມັນເຄື່ອງ

ກວດເບິ່ງລະດັບນ້ຳມັນເຄື່ອງໃຫ້ຢູ່ໃນລະດັບປົກກະຕິ ໂດຍເບິ່ງຈາກກ້ານວັນລະດັບນ້ຳມັນບໍ່ໃຫ້ສູງຫຼືຕ່ຳເກີນໄປ ບໍ່ຊະນັ້ນມັນຈະເກີດຄວາມເສຍຫາຍຕໍ່ລະບົບເຄື່ອງຍົນຂອງທ່ານໄດ້

7. ລະບົບລໍ່ເຢັນ ໝໍ່ນ້ຳ

ເຊັ່ນດຽວກັນກັບນ້ຳມັນລົດ ໃຫ້ກວດວ່າລະດັບນ້ຳຂອງລະບົບຫຼໍ່ເຢັນບ່ອນໝໍ້ພັກນ້ຳຢູ່ໃນລະດັບປົກກະຕິບໍ່ ແລະຄວນພົກນ້ຳກັ່ນໄວ້ເພື່ອມີເຫດສຸກເສີນ

8. ເຄື່ອງມືປະຈຳລົດ

ກວດເບິ່ງວ່າໃນລົດມີອຸປະກອນແປງລົດຄົບຖ້ວນບໍ່ເຊັ່ນ: ເຫຼັກໄຂຄວງ,ກະແຈໄຂ, ຢາງອາໄຫຼ, ສາຍພ່ວງແບັດເຕີຣີ, ສາຍພວງລາກລົດ, ປ້າຍສຸກເສີນສະທ້ອນແສງ ແລະ ອື່ນໆ  

ຖ້າລົດຂອງທ່ານມີບັນຫາ ທ່ານສາມາດນຳເອົາເຂົ້າສູນທີ່ທ່ານຊື້ລົດມາ ຫຼືນຳເອົາເຂົ້າຮ້ານແປງລົດທີ່ທ່ານຕ້ອງການ

yula.la ໄດ້ຂຽນບົດຄວາມແນະນຳຮ້ານສ້ອມແປງລົດໄວ້ທີ່ລິ້ງທາງລຸ່ມນີ້

https://bit.ly/3q43j9l

ບົດຄວາມໂດຍ : ວະນິດາ ສຸວັນນະວົງ